Bantaba

SARRERA

Ikastaro proposamen honen bitartez saiatuko gara aztertzen alde batetik, generoaren perspektibak garapenean dituen ondorio sakonak; eta, bestetik, garapenaren alderdiak zein modutan kontzeptualizatzen diren eta alderdi horiei nondik heltzen zaien. Hala bada, hainbat gauza ulertzeko beharra dago: bai gizon eta emakumeen arteko desberdintasunak, bai bi horien arteko harremanak; baina baita harreman horiek garapenean duten eragina eta lankidetza politiketan emakumeek duten esku hartzea ere. Egun, erabat onartu da generoari loturiko gaiak kontuan ez hartzeak zer eragin dakarren. Berbarako: proiektuek porrot egin dezakete, ez direlako kontuan hartu emakumeek ekonomian duten rola eta horri egin diezazkioketen funtsezko ekarpenak; emakumeen lan-kopuruak gora egin dezake, garapenean esku hartzeko ekimenen ondorioz; eta kreditu-sistemek edo diru-sarrerak sortzekoek (emakumeek dirua eskuratzeko aukerak gehitu nahian) lur jo dezakete, dirua emakume horien senarren mende dagoelako. Hori guztia dela eta, proposatzen duguna da hainbat esparrutan garatzeko bidean dauden emakumeen errealitatera hurbiltzea, generoaren teoria ulertzea, emakumeen esku hartzeari buruzko ikusmoldeek izan duten garapena aztertzea eta lankidetzan gauzatu diren ikuspuntuak ezagutzea.

HELBURU ZEHATZAK

  • Generoarekin, garapenarekin eta lankidetzarekin loturik dauden oinarrizko kontzeptuak argitzea.
  • Jakitea zein den Hegoaldeko emakumeei laguntzeko nazioarteko lankidetza ekimenen eta nazioarteko erakundeen proposamenen arteko lotura, eta zein diren orain artean burutu diren politiken ikuspuntuak.
  • Parte-hartzaileengan genero arazoekiko sentiberatasun maila handiagoa sortzea, jarrera horiek aldaketak lortzeko konpromisoetan gauzatu daitezen, eta gizon eta emakumeen arteko bidezko harremanak bultzatzeko.

EGITASMOA

  • Emakumeek hainbat eremutan jasaten duten desberdintasunaren ikuspegia: biztanleria, familia, hezkuntza, osasuna, ekonomia eta lana, giza eskubideak, gizartean eta politikan parte hartzea eta erabakiak hartzea.
  • Feminismoak generoaren teoriari eginiko ekarpenak: patriarkatua eta sexu-genero sistema.
  • Generoaren gizarte eraketa. Genero rolak, sexudun nortasuna, statusak, arauak, estereotipoak eta zigorrak.
  • Genero kontzeptua, garapenaren eta lankidetzaren esparruan.
  • Emakumeek garapenean izan behar duten parte hartzeari buruzko ikusmoldeen bilakaera.
  • Giza garapena, generoen arteko zuzentasuna gordeaz: generoa garapenean.
  • Hegoaldeko emakumeei laguntzeko politiken estrategiak eta ikuspuntuak.

DESKRIPTOREAK

Genero-desberdintasuna. Patriarkatua. Sexua. Generoa. Rola. Laneko genero banaketa. Sexudun nortasuna. Emakumea Garapenean Korrontea. Generoa Garapenean Korrontea. Lankidetza politiken ikuspuntuak.

NORETZAT DA IKASTAROA

Ikastaroa egiteko orduan, honako hauek izan ditugu gogoan: GGKEtako langileak, gizarte mugimenduak, lankidetza eta garapenerako hezkuntzaren esparruan lan egiten duten erakundeak, nazioarteko garapen eta lankidetzan espezialista izateko master edo ikastaroetako ikasleak eta web orrialdeko erabiltzaileak, garapena bultzatzeko lanean nabarmendu direnak. Azken finean, genero-arazoaren alderdira lehenengo aldiz hurbildu nahi duen edozein.

IRAUPENA

12 ordu.

BALIABIDE TEKNIKOAK

Gardenki-proiektorea, paperografoak, koloretako kartoi meheak, txartel zuriak eta arkatz markatzaileak.